今日小學雞「發噏風」- 話說政府同金管局班大人拍板，2026年11月16號起，香港證券市場正式玩「無紙化」（USM）！
簡單嚟講，由11月中開始上市嘅新股（IPO），一律唔會再印任何實物股票。至於我哋手上揸住嗰啲舊股票，亦都會喺未來5年內分批被「強行去實物化」。
一講到呢度，我相信好多同我一樣、喺股海浮沉多年嘅「老散」，第一時間實係諗到：「五年後真係冇得再拎張俗稱『牆紙』嘅實物股票返屋企收埋櫃桶底」
以前實物股票最正嘅地方，係無論你張紙上面印住 1 股、定係 100 萬股，去股份登記處過戶，最後都係劃一收 HK$2.5 一張。
無咗張紙，大家最關心嘅梗係點收費啦！暫時收到風，以後如果你唔想放喺銀行或者證券商俾佢哋收託管費，想用自己個人名義直接揸住電子股票、做個「真‧股東」去股東大會，就要開個叫「持股易」（USI）嘅電子戶口。開戶費用上限 HK$50（中央證券嗰邊拍心口話暫時會豁免）；而將你手上現有嘅舊牆紙變做電子股票，收費上限HK$5。
「老散傳家寶」
聽聞以前恒生銀行股票真係何善衡用毛筆逐張逐張在股票的董事簽名欄上大筆一揮。
今日留返張股數夠多的實體股票也可以接受 - 「跌落地揦返拃沙」！
反正5年之後全世界都唔會再有實物股票。不如我睇吓自己手頭上有邊幾隻股票持股數目夠大，走去過戶登記處換一大張數目嘅『牆紙』！
百年歸老之後，佢哋喺保險箱拎出一張印住『1,000,000』、蓋晒鋼印嘅真股票，班後人吹水：『阿爺當年算得上是半個老散，曾經持有某隻股票100萬股！』
現實係殘酷嘅：阿爺，未儲夠數!
正當我沉醉喺「百萬大戶」嘅幻想入面，打算今朝起手 check 吓自己「長線收息組合」進度嗰陣……一開部電腦，現實一巴掌車過嚟，打到我醒晒。
我望住自己個倉，再睇返之前喺網誌寫過嘅持倉紀錄，我一邊睇一邊眼淚在心裏流（全部未夠數）：
• 005（匯豐）：有……每年加一手半手囉。
• 002（中電）：有……已經連續兩年冇加倉。
• 823（領展）：有……努力中，但未儲夠。
• 016（新地）：有……喺網誌大讚新地末期息派 2.93 元好亮眼，可惜已經貴到買唔落手（係我冇錢買就真）。
我掐指一算，就算我真係長命百歲、餐餐捱麵包、瘋狂加倉，以我呢個老散嘅財力，呢幾隻神級重磅藍籌，我呢一世、甚至下幾世，都絕對儲蓄不到 100 萬股這個數目！如果中六合彩，三、五十萬就有啲機。
不過，作為一個打不死嘅香港老散，最叻就係行「執生」路線。既然 1、2、5、16、388 儲唔到 100 萬股，不如改行「平民傳家寶」戰術，一樣可以滿足阿爺嘅虛榮心：
「內銀股」平價大藍籌：幾蚊港元嘅內銀股（939、3988）。雖然 100 萬股都要幾百萬，但起碼好過 388 幾億元先吖！當作一個終極人生儲蓄目標，儲到幾多得幾多。
或者情懷戰術（不計股數）：唔追求 100 萬呢個數字。改為買一兩手大家樂（341）、大快活（52）或者港鐵（66），每隻藍籌再買幾手，印張實物出嚟貼牆。話俾後人聽：「當年香港人返工放工、一日三餐都係幫襯呢幾間公司，阿爺假假地都係股東！」
所以話，買股票買到我哋呢啲老散咁，最緊要識得苦中作樂。反正 2026 年 11 月之後，實物股票正式進入倒數階段，絕版在即。
大家又諗住喺未來 5 年之內，提出邊隻心水股票出嚟，印張絕版牆紙嚟留給子孫呢？
有時間可以去報名參加投資者中心流動應用程式樂齡班，費用全免，學吓點樣用持股易APP。
呢個「持股易」應該唔係全港統一一個系統，好似每一個股份登記處（過戶處）都要你單獨下載一個佢哋專用嘅軟件！
https://www.computershare.com/hk/zh
https://www.boardroomlimited.com/hk/ch
利申： 快餐店板塊之外， 持有以上各股。本文僅為個人投資日記，不構成任何投資建議。
No comments:
Post a Comment