新世界發展(17)鄭氏幾父子,資本市場的「傳奇」。將「抽水」昇華到了「行為藝術」的境界。
歷代掌舵人匠心獨運,將供股、合股、再供股,逐漸昇華成一套大型沉浸式行為藝術。展期橫跨二十多年,小股東唔止係觀眾,仲係贊助商、展品,兼埋清場時掃走嗰堆泥。
入場費極貴,不設退票;出口理論上有,只不過出去嗰陣,身家通常留低咗做常設展覽。
首先玩「魔戒(供股)三部曲」(2004年五供二、2011年二供一、2014年三供一),隔幾年就向「衣食父母」伸手要錢,合共抽水三百幾億。小股東以為供完就可以「返家鄉」?太天真了
去到2020年,來一招「四合一」合股,將股價「魔術變身」到 36元 樓上。魔術變完,股價坐「跳樓機」直插無水花。
呢套「魔戒三部曲」最妙之處,係供股好似續會:唔續費,舊會籍即刻縮水;續咗費,就獲得參加下一輪供股嘅寶貴資格。三部曲完咗都唔使失落,因為藝術家最擅長嘅,永遠係拍前傳、續集同重啟版。
新一代接棒,品味果然不同,凡事講求「文化」與「藝術成份」,11 SKIES (11 個天空 - 仲要多過四大皆空),商場要變身藝術館,「1供11」世紀大供股,這不是問衣食父母攞零用錢,而是直接叫父母賣腎來贊助自己的「藝術夢」,完美示範甚麼叫「割韭菜的最高境界」——連根拔起,連泥都幫你鏟走。
最令人拍案叫絕的是,新一代掌舵人鄭志剛還身兼「香港財富傳承學院」董事會主席,教導富豪如何做好「家族治理」與「財富傳承」。我估計他上堂第一句:「千祈唔好學我,唔好去玩藝術!」
- 鄭志剛於新世界業績同日出Post 榮幸香港財富傳承學院主席兩年
計一計數,當年忠心耿耿跟足供股的「衣食父母」,今日戶口到底發生了甚麼事:
- 2014年跟供的苦主:當年供股價6.2元,經歷2020年「四合一」後,相當於每股成本 24.8元。對比今日復牌跌穿2.7元(以及供股後的理論除權價 1.23元),當年的血汗錢已經蒸發了 89% 至 95%!
- 2020年合股時信以為真的苦主:當年合股後股價約 36元,今日望一望報價機,帳面直接唔見咗 超過92%(若計及除權價更蒸發逾 96%)。
- 今次「1供11」的兩難:手執一手(1,000股)的散戶,要跟供就得再掏出 9,900元 填海;如果不跟供,股權即時被攤薄超過 75%,真正做到「唔供就變空氣,跟供就變烈士」。
當年的「新世界」,變成資產蒸發的「新境界」,成功幫大家提前實現了「財富(歸零)自由」戶口裡面已經「四大皆空,蝕到渣都冇」。
深刻體會到甚麼叫做「藝術是無價的」——因為我們的身家,已經跌到毫無價值了。
其實「小學雞」有學人玩偽術,也有自知之明,唔配欣賞十一個天空;唔會買部 Leica 走入 K11 扮大師溝女。自知乜嘢料——簡直衰過肥田料!算罷啦,唔好咁多幻想,只會行過路過隨便拎部手機影吓K11!
事到如今仲問應該點做?唯有召喚包大人出動「龍頭鍘」侍候!一刀切落去,一了百了眼不見為淨,免得日日睇住個倉心臟病發!
利申:無貨在手,食花生居多。奉勸各位(包括我平安紙上的受益人):千祈唔好掂新世界!偶爾小注「即日鮮」賺餐下午茶無妨,但千萬別動真情搞「過夜」,否則隨時變長情蟹貨。一如既往,純屬個人發噏瘋,並非投資建議。
No comments:
Post a Comment