內銀買邊隻好？

首先多謝標兄留言， 畀個機會小弟發噏風。

內銀就得939、1398、3988仲未穿18年個高位。

今日公司身邊有3個一般散戶問，內銀買來收息邊隻好？

3個同一日咁問令我有D不知所措，手上有少少倉底買在23年"底位"，部份已經提取實物股票，本來打算揸住長收息，但比佢地咁樣吓一吓，動搖咗長揸嘅決心。

唔似D中間價買入嘅股票，沽曬當止賺唔可惜、唔後悔，現在反而覺得好難操作，假若放咗佢，都唔知以後有無機會見返買入位！

唔知鞭兄有乜部署，或者類似經驗可以分享下？

1/  內銀買來收息邊隻好？

現時真是選擇困難.... 一年多前的港股像位未化妝中學生，今日位位變咗香港小姐.    從前一盒維他奶任你溝，現時冇一粒培育鑽石都無人睬你！

今時不同往日 ，升得太急 ，升得太多，真心，現時.   我都唔知買乜内銀...其實隻隻差唔多，唯有博愛，分開買。如計埋每次派息銀行最少分咗$30，每次最高收取$1800 - $2000，長線收息，股數多，我一定取實物。

另外2023年尾 同現在有好幾隻銀行股升咗1倍多 。

939     114.2%

3988   107%

2888   102.5%

1288   141.7%  

988     153.2%

 

就算一夜情也好難代朋友選擇，人心難測，有時識咗好耐先知佢係基佬！

長線收息，就算不是找老婆，都係搵二奶，各花入各眼，好難代為推薦。

以下列表從EJFQ取得，表內有最新背景，體重，身材，性格，食量，習慣等等資料，我會請同事睇完再自行決定。 

「唔做中，唔做保，唔做媒人三代好」。

2/  操作問題...假若放咗佢，都唔知以後有無機會見返買入位！

不是冇機會買返，最怕機會到咗，冇錢買返，因為啲錢已經買咗其他股票!

小弟並非專業人士，只是是夠傻： 大隻嗰啲，只要夠平有閒錢，就買。

有足夠耐性 ：買咗，派息吸引，放埋一邊，價高，就慢慢放走啲...

低位購入相對高息的股票，假設餘生唔等錢睇醫生，那些股票當年金/社保看待.  8+% 厘息,買美3年.....30年債都冇咁多利息！

例如低位購入的平保，太地，領展 ，中銀香港 ....這幾手留返做牆紙開心下，我相信以後都好難買得返.   中美爭拗地緣政治之下才有這個機會....分手完成之後各有各精彩。

利申，按比重排行內銀主要持有939，3988，1398。

其他內銀也有，但數量太少, 不值一提。

後記，今天倉底中咗隻冷馬，308，$2.5直沽。