🗒 今日唔講平保加息，亦唔講聯通唔派息，傾吓新一期銀色債券。
買銀債唔單止係貪佢 4.25 厘保底息咁簡單，最緊要係鎖好啲棺材本，費事耳仔軟做咗何伯！
眼下個社會幾亂？半生血汗錢，識個陌生女人，好快就俾人哄到暈陀陀(鹹魚當海鮮食)，金飾名錶雙手放上，親生仔女反面，爛泥咁收科。
科技發達，一個APP㩒個掣立刻轉走，迷戀的時候😍，衝動上頭嗰陣🥰，神仙都幫你唔到👻。
講得誇張啲，湯都未飲，理智盡失(自己開心到失禁，仔女擔心到瀨尿)!
買銀債妙就妙在有「防暈陀陀🤮」：
- 冷靜緩衝期：不設二手市場，提前贖回要行程序、等好幾日。
- 財富防波堤：拖幾日，去想清楚(飲碗鹹魚豆腐湯先🍲)，唔會一時糊塗送身家。
- 隱藏防騙力：呢個免費功能，值錢過個保證派息💸。
再者，從技術層面嚟睇，呢招仲可以幫你分散風險，做一個三年嘅防禦循環：
- 三年一循環：根據以往記錄，每人平均只係分到大約 19.8 手。如果年年買一份，買足三年總共鎖死 60 萬元的長遠棺材本。
- 止蝕防護網：萬一真係有一年臨老入花叢，當期手頭最多都係輸 20 萬元🤨。除非對手真係厲害到搞到你神魂顛倒，連另外嗰 40 萬元都提早贖回埋，如果去到這個地步真係抵死，亦都可能找到真愛(恭喜晒)，死而無憾🥰!
政府近5年銀債認購概覽:
年份 保底息 最終發行額 每人最多獲派
2025年 3.85厘 550億元 17手
2024年 4厘 550億元 24手
2023年 5厘 550億元 23手
2022年 4厘 450億元 21手
2021年 3.5厘 300億元 14手
假設長者戶口有個恒生銀行「憂財憂米」戶口（優越理財 Prestige Banking），最少有 1,000,000 💰元喺度。扣除上述買銀債嘅 60 萬元，剩返 40 萬元流動資金，咁樣「六四分流」，直頭係散戶攻守兼備嘅教科書式示範📚！
這 40 萬元活水，擺喺戶口隨時調配，既能保住「優越理財」身份，又可以睇情況主動調整：（分批做三個月短定期）：每 90 天就「收割」一次利息加本金。萬一需要找醫藥費，每三個月有一筆現金解凍，就算傷風感冒，頂多等三個月先夠錢去睇醫生🏥(假設期間病情冇惡化到肺炎🚨，問題不大，死唔去✝️)。
有 60 萬銀債每半年定時定候「斟茶遞水」發放利息；手頭上又有 40 萬流動現金做短定期。長者找到黃昏戀對象，需要動用資金買材料去煲蓮藕湯，手頭最多亦只有 40 萬可以「雙手奉送」，另外嗰 60 萬銀債要提早贖回需要行程序、起碼飲飽湯先再作打算。
利申 : 已申請銀債，等緊飲迷湯❤️
No comments:
Post a Comment